హైదరాబాద్ మెట్రో రుణంపై ఢిల్లీలో కీలక చర్చలు
జపాన్ బ్యాంక్ నుంచి నేరుగా లోన్ కోసం కసరత్తు, కేంద్ర అనుమతులపై రాష్ట్ర దృష్టి
హైదరాబాద్ మెట్రో రైలు మొదటి దశ ప్రాజెక్టును ముందుకు తీసుకెళ్లేందుకు రాష్ట్ర ప్రభుత్వం చర్యలు వేగవంతం చేసింది. రాష్ట్ర ప్రభుత్వ ప్రధాన కార్యదర్శి సంజయ్ జాజు, హెచ్ఎంఆర్ఎల్ ఎండీ సర్ఫరాజ్ అహ్మద్ గురువారం ఢిల్లీలో కేంద్ర అధికారులతో భేటీ కానున్నారు.
మెట్రో మొదటి దశకు సుమారు రూ.13,600 కోట్ల రుణం సమీకరించేందుకు ప్రభుత్వం ప్రయత్నిస్తోంది. ఎస్పీవీ, జపాన్ బ్యాంక్ మార్గంతో పాటు నేరుగా జపాన్ బ్యాంక్ ద్వారా లోన్ తీసుకునే అవకాశాన్ని అధికారులు పరిశీలిస్తున్నారు. 4 శాతం వడ్డీతో రుణం లభించే మార్గంపై చర్చలు ప్రారంభమైనట్లు అధికారులు తెలిపారు. అదే సమయంలో 8 శాతం వడ్డీతో ఇతర బ్యాంకులు, ఫైనాన్స్ సంస్థల నుంచి రుణం పొందే అవకాశాలనూ పరిశీలిస్తున్నారు.
కేంద్ర పట్టణాభివృద్ధి శాఖ, రైల్వే శాఖ అధికారులతో జరిగే సమావేశాల్లో రుణ సేకరణ, భూసేకరణ, మొదటి దశ స్వీకరణ, రెండో దశ విస్తరణ అంశాలు చర్చకు రానున్నాయి. రెండో దశ ప్రాజెక్టుకు సంబంధించిన డీపీఆర్, ఇతర వివరాలను కేంద్రానికి అందించే అవకాశం ఉంది. కేంద్ర అనుమతులు లభిస్తే రుణ ప్రక్రియ వేగం పుంజుకుంటుందని రాష్ట్ర అధికారులు భావిస్తున్నారు.
HIGHLIGHTS
- రూ.13,600 కోట్ల రుణంపై కసరత్తు
- జపాన్ బ్యాంక్ ద్వారా 4 శాతం వడ్డీ అవకాశం
- ఢిల్లీలో గురువారం కీలక భేటీలు
- రెండో దశ డీపీఆర్ కేంద్రానికి అందించే అవకాశం
మూసీ పునరుజ్జీవన ప్రాజెక్టుకు ఏషియన్ డెవలప్మెంట్ బ్యాంక్ నుంచి రూ.4,500 కోట్ల రుణం లభించిన నేపథ్యంలో, మెట్రో ప్రాజెక్టుకూ అంతర్జాతీయ ఆర్థిక సంస్థల సహకారం పొందాలని ప్రభుత్వం భావిస్తోంది. అయితే ఈ తరహా విదేశీ రుణాలకు కేంద్ర ప్రభుత్వ సమ్మతి అవసరం కావడంతో ఢిల్లీ చర్చలకు ప్రాధాన్యం ఏర్పడింది.
కేంద్ర సర్వీసులో పనిచేసిన అనుభవం ఉన్న సంజయ్ జాజు ఈ సమన్వయానికి ఉపయోగపడతారని అధికారులు చెబుతున్నారు. ఆయన ఢిల్లీ పర్యటన నేపథ్యంలో హెచ్ఎంఆర్ఎల్ ఎండీ సర్ఫరాజ్ అహ్మద్ కూడా బుధవారం అక్కడికి చేరుకున్నారు. చర్చల అనంతరం రాష్ట్ర ప్రభుత్వం రుణ మార్గం, అమలు షెడ్యూల్పై తదుపరి నిర్ణయం తీసుకునే అవకాశం ఉంది.
