హైదరాబాద్ పోలీసు కమిషనరేట్లో డివిజన్ల పేర్లు, సరిహద్దుల మార్పు
జీహెచ్ఎంసీ పునర్వ్యవస్థీకరణకు అనుగుణంగా హోంశాఖ ముఖ్య కార్యదర్శి శిఖా గోయల్ అధికారిక జీవో విడుదల చేశారు
హైదరాబాద్ నగర విస్తరణ, జీహెచ్ఎంసీ పరిధిలోని పరిపాలనా మార్పులను దృష్టిలో పెట్టుకుని తెలంగాణ ప్రభుత్వం హైదరాబాద్ పోలీసు కమిషనరేట్లో డివిజన్ల పేర్లు, పోలీసు స్టేషన్ల సరిహద్దులను సవరించింది. హోంశాఖ ముఖ్య కార్యదర్శి శిఖా గోయల్ గురువారం దీనికి సంబంధించిన జీవో విడుదల చేశారు.
జారీ చేసిన నోటిఫికేషన్ ప్రకారం ఆర్జిఐఎ డివిజన్ ఇకపై శంషాబాద్ డివిజన్గా వ్యవహరించనున్నారు. చిక్కడ్పల్లి డివిజన్ పేరును కాచిగూడ డివిజన్గా, సంతోష్నగర్ డివిజన్ పేరును ఛత్రినాక డివిజన్గా మార్చారు. పరిపాలనా సౌలభ్యం, భౌగోళిక మార్పులు, పెరిగిన జనాభా ఒత్తిడిని పరిగణనలోకి తీసుకుని ఈ నిర్ణయాలు తీసుకున్నట్లు హోంశాఖ జీవోలో తెలిపింది.
బడంగ్పేట్ పోలీసు స్టేషన్ను ప్రభుత్వం రద్దు చేసింది. ఆ స్టేషన్ పరిధిలో ఉన్న ప్రాంతాలు, కాలనీలను సమీపంలోని ఇతర పోలీసు స్టేషన్ల పరిధిలోకి రీఆర్గనైజ్ చేశారు. ఏ ప్రాంతం ఏ పోలీసు స్టేషన్, ఏ డివిజన్ పరిధిలోకి వస్తుందో ప్రభుత్వం నోటిఫికేషన్లో స్పష్టం చేసింది. రాష్ట్ర డిజిపి పంపిన సవరణ ప్రతిపాదనలను పరిశీలించిన తర్వాత ఈ మార్పులకు ఆమోదం తెలిపినట్లు అధికార వర్గాలు తెలిపాయి.
HIGHLIGHTS
- ఆర్జిఐఎ డివిజన్ పేరు శంషాబాద్ డివిజన్గా మార్పు
- చిక్కడ్పల్లి డివిజన్ ఇక కాచిగూడ డివిజన్
- సంతోష్నగర్ డివిజన్ పేరు ఛత్రినాక డివిజన్
- బడంగ్పేట్ పోలీసు స్టేషన్ రద్దు
- కొత్త సరిహద్దులపై హోంశాఖ జీవో విడుదల
లా అండ్ ఆర్డర్ పోలీసు స్టేషన్లకు అనుసంధానంగా ట్రాఫిక్ పోలీసు స్టేషన్ల సరిహద్దులను కూడా సవరించారు. నగరంలో విస్తరిస్తున్న కాలనీలు, ట్రాఫిక్ రద్దీ, అత్యవసర స్పందన అవసరాలను పరిగణనలోకి తీసుకున్నట్లు పోలీసు అధికారులు తెలిపారు. ఈ మార్పులతో రెస్పాన్స్ టైమ్ తగ్గి, క్షేత్రస్థాయిలో పర్యవేక్షణ మెరుగుపడుతుందని అధికారులు అంచనా వేస్తున్నారు.
పునర్వ్యవస్థీకరణ అమలుకు సంబంధించి పోలీసు శాఖ అంతర్గత ఉత్తర్వులు జారీ చేయనుంది. సవరించిన డివిజన్లు, కొత్త సరిహద్దుల ఆధారంగా పోలీసు యంత్రాంగం విధులు నిర్వహించనుంది. ప్రజలకు సేవల్లో అంతరాయం కలగకుండా స్టేషన్ స్థాయి సిబ్బందికి కొత్త పరిధుల వివరాలు చేరవేయనున్నట్లు అధికారులు తెలిపారు.
