అర్హులైన వారందరికీ పింఛన్లు మంజూరు చేయాలి
జగిత్యాల జిల్లాలో 7,439 దరఖాస్తులు పెండింగ్లో ఉన్నాయని మంత్రి సీతక్కకు మాజీ కౌన్సిలర్ జయశ్రీ వినతి
చేయూత సామాజిక భద్రత పింఛన్ల కోసం దరఖాస్తు చేసిన అర్హులందరికీ వెంటనే మంజూరు చేయాలని మాజీ కౌన్సిలర్ హనుమండ్ల జయశ్రీ శనివారం రాష్ట్ర పంచాయతీరాజ్, గ్రామీణాభివృద్ధి శాఖ మంత్రి దనసరి అనసూయ సీతక్కకు వినతిపత్రం అందజేశారు.
జయశ్రీ తెలిపిన వివరాల ప్రకారం, జగిత్యాల జిల్లాలో 18,955 మంది పింఛన్ల కోసం దరఖాస్తు చేసుకోగా 11,516 మందికి మాత్రమే మంజూరు పత్రాలు అందాయి. ఇంకా 7,439 మందికి పింఛన్లు మంజూరు కాలేదని ఆమె పేర్కొన్నారు. “అర్హులైన ప్రతి ఒక్కరికీ పింఛన్లు మంజూరు చేసి పేద కుటుంబాలకు అండగా నిలవాలి,” అని జయశ్రీ మంత్రిని కోరారు. పెండింగ్లో ఉన్న వారిలో సుమారు 2,300 మంది చేనేత కార్మికులు ఉన్నారని ఆమె వివరించారు.
Also Read- డైలీ కరెంట్ అఫైర్స్ 21 నవంబర్ 2026: పరీక్షలకు 20 ముఖ్యాంశాలు
HIGHLIGHTS
- జిల్లాలో 18,955 దరఖాస్తులు
- 11,516 మందికి మంజూరు పత్రాలు
- 7,439 దరఖాస్తులు పెండింగ్
- సుమారు 2,300 మంది చేనేత కార్మికులు
“రెక్కాడితే గానీ డొక్కాడని చేనేత కార్మికులకు పింఛన్లు అందకపోవడం బాధాకరం,” అని జయశ్రీ అన్నారు. వితంతువులు, ఒంటరి మహిళలు, దివ్యాంగులు, గీత కార్మికులు, పైలేరియా బాధితులు కూడా ఎదురుచూస్తున్నారని తెలిపారు. “సదరం ధ్రువపత్రాల రెన్యూవల్లో జాప్యం వల్ల దివ్యాంగులు పింఛన్లకు దూరమవుతున్నారు,” అని ఆమె చెప్పారు. ఆన్లైన్లో దరఖాస్తుల వివరాలు ‘నో రికార్డ్’గా కనిపిస్తున్నాయని, దీనిపై అధికారులు వెంటనే చర్యలు తీసుకోవాలని కోరారు. వినతిపత్రం ప్రతిని జిల్లా కలెక్టర్కు కూడా పంపినట్లు జయశ్రీ తెలిపారు.
