తెలంగాణ రాజకీయాల్లో సంక్రాంతి తర్వాత మరోసారి రాజకీయ వేడి పెరగనుందని ముఖ్యమంత్రి రేవంత్‌ రెడ్డి వ్యాఖ్యానించారు. సంక్రాంతి అనంతరం ‘ప్రజాబలం’ పేరుతో రాష్ట్రవ్యాప్తంగా పర్యటించి సునామీ సృష్టిస్తామని, ఆ ప్రభావంలో ప్రధాని నరేంద్ర మోదీ, బీఆర్ఎస్ అధినేత కేసీఆర్‌ కొట్టుకుపోతారని అన్నారు. తన సొంత నియోజకవర్గం కొడంగల్‌లో పర్యటించిన ఆయన.. కేంద్రంలోని బీజేపీ ప్రభుత్వంతో పాటు రాష్ట్రంలోని ప్రతిపక్ష బీఆర్ఎస్‌పై తీవ్ర విమర్శలు చేశారు.
మోదీ, కేసీఆర్‌లపై ఘాటు వ్యాఖ్యలు
సోమవారం కొడంగల్‌లో నిర్వహించిన రైతు ఆత్మీయ సభలో రేవంత్‌ రెడ్డి మాట్లాడుతూ.. ఢిల్లీలో ఉన్న మోదీ అయినా, ఫామ్‌హౌస్‌లో ఉన్న కేసీఆర్‌ అయినా తాను భయపడబోనని స్పష్టం చేశారు. కొడంగల్‌ ప్రజల ఆశీర్వాదం ఉంటే ఢిల్లీనైనా ఎదురించి నిలబడతానని ధీమా వ్యక్తం చేశారు. బీఆర్ఎస్ వర్కింగ్‌ ప్రెసిడెంట్‌ కేటీఆర్‌పైనా విమర్శలు గుప్పించారు. గడ్డం పెంచుకున్నంత మాత్రాన నాయకత్వ లక్షణాలు రావని, పది జన్మలు ఎత్తినా కేటీఆర్‌ తనలా కాలేరని వ్యాఖ్యానించారు.
కొడంగల్‌లో అభివృద్ధి పనులకు శ్రీకారం
తన మూడు రోజుల పర్యటనలో భాగంగా లగచర్లలో ఎకో ఫామ్‌ ఆయిల్‌ ఫ్యాక్టరీతో పాటు పలు అభివృద్ధి పనులకు సీఎం శంకుస్థాపన చేశారు. ఈ సందర్భంగా రైతులను ఉద్దేశించి మాట్లాడుతూ.. ఎల్‌నినో ప్రభావంతో రాష్ట్రంలో కరువు పరిస్థితులు ఏర్పడే అవకాశం ఉందని పేర్కొన్నారు. రైతులు నీటిని పొదుపుగా వినియోగించుకోవాలని, ఆరుతడి పంటల సాగుపై దృష్టి పెట్టాలని సూచించారు. రాష్ట్రంలో బియ్యం నిల్వలపై ఆందోళన చెందాల్సిన అవసరం లేదని, ఏడాదికి సరిపడా నిల్వలు ప్రభుత్వ వద్ద ఉన్నాయని భరోసా ఇచ్చారు.
బీఆర్ఎస్ పాలనపై విమర్శలు.. కృష్ణా జలాలపై హామీ
గత బీఆర్ఎస్ ప్రభుత్వ హయాంలో తెలంగాణ రూ.8 లక్షల కోట్ల అప్పుల్లో కూరుకుపోయిందని రేవంత్‌ రెడ్డి ఆరోపించారు. ఎన్ని అడ్డంకులు ఎదురైనా 2028 డిసెంబర్‌ నాటికి కొడంగల్‌కు కృష్ణా జలాలను తీసుకొస్తామని హామీ ఇచ్చారు. హైదరాబాద్‌ నుంచి కొడంగల్‌కు గ్రీన్‌ఫీల్డ్‌ రోడ్డు నిర్మాణంతో పాటు పారిశ్రామిక వాడల అభివృద్ధి పనులను వేగవంతం చేస్తున్నట్లు తెలిపారు.
HIGHLIGHTS
- సంక్రాంతి తర్వాత ‘ప్రజాబలం’ పేరుతో రాష్ట్రవ్యాప్త పర్యటన చేపడతామని రేవంత్‌ రెడ్డి ప్రకటన.
- మోదీ, కేసీఆర్‌లపై సీఎం ఘాటు వ్యాఖ్యలు.
- కేటీఆర్‌ నాయకత్వంపై విమర్శలు.
- లగచర్లలో ఆయిల్‌ ఫ్యాక్టరీ, అభివృద్ధి పనులకు శంకుస్థాపన.
- 2028 డిసెంబర్‌ నాటికి కొడంగల్‌కు కృష్ణా జలాలు తీసుకొస్తామని హామీ.
- ఎల్‌నినో నేపథ్యంలో నీటిని పొదుపుగా వాడాలని రైతులకు సూచన.
తాను ముఖ్యమంత్రిగా బాధ్యతలు చేపట్టినప్పటి నుంచి ఒక్కరోజు కూడా సెలవు తీసుకోలేదని, రోజుకు 18 గంటల పాటు పనిచేస్తున్నానని చెప్పారు. అభివృద్ధి విషయంలో ఎవరినీ లెక్కచేయబోనని స్పష్టం చేశారు. సంక్రాంతి తర్వాత రాష్ట్రవ్యాప్తంగా చేపట్టనున్న ‘ప్రజాబలం’ పర్యటన తెలంగాణ రాజకీయాల్లో ఎలాంటి ప్రభావం చూపుతుందన్నది ఆసక్తికరంగా మారింది.
Also Read- నవంబర్ 18న కరీంనగర్‌లో బీజేపీ మహా పాదయాత్ర.. లక్ష మందిని సమీకరించేలా బండి సంజయ్‌ ఏర్పాట్లు