99TV News

    బైక్‌ ట్యాక్సీల ప్రతిపాదనపై క్యాబ్‌ డ్రైవర్ల ఆగ్రహం

    బైక్‌ ట్యాక్సీల ప్రతిపాదనకు తెలంగాణ క్యాబ్‌ డ్రైవర్ల వ్యతిరేకత

    బైక్‌ ట్యాక్సీల ప్రతిపాదనపై క్యాబ్‌ డ్రైవర్ల సంఘాల ఆగ్రహం

    ప్రైవేట్‌ ద్విచక్ర వాహనాల వాణిజ్య వినియోగానికి అనుమతి ఇస్తే ఉపాధి దెబ్బతింటుందని సంఘాల హెచ్చరిక

    హైదరాబాద్‌, సెప్టెంబర్‌ 5 —

    ప్రైవేట్‌ ద్విచక్ర వాహనాలను బైక్‌ ట్యాక్సీలుగా వినియోగించేందుకు రాష్ట్ర ప్రభుత్వాలను అనుమతించాలన్న కేంద్ర ప్రభుత్వ ప్రతిపాదనను తెలంగాణ క్యాబ్‌ అసోసియేషన్‌, గిగ్‌ యూనియన్‌ నాయకులు శుక్రవారం హైదరాబాద్‌లో తీవ్రంగా వ్యతిరేకించారు. ఈ నిర్ణయం అమలైతే వాణిజ్య వాహనాలపై ఆధారపడుతున్న వేలాది మంది డ్రైవర్ల జీవనోపాధిపై ప్రతికూల ప్రభావం పడుతుందని వారు ఆందోళన వ్యక్తం చేశారు.

    బీఆర్‌టీయూ క్యాబ్‌ యూనియన్‌ అధ్యక్షుడు నగేశ్‌ మాట్లాడుతూ, “వైట్‌ నంబర్‌ ప్లేట్‌ ఉన్న ప్రైవేట్‌ వాహనాలను వాణిజ్య అవసరాలకు వినియోగించేందుకు అనుమతించడం సరికాదు,” అని శుక్రవారం హైదరాబాద్‌లో చెప్పారు. వాణిజ్య వాహనాలు నడిపే డ్రైవర్లు పన్నులు, ఫిట్‌నెస్‌, పర్మిట్లు, ఇన్సూరెన్స్‌, ఇతర నియంత్రణ ఖర్చులు భరిస్తున్నారని ఆయన తెలిపారు. అదే సమయంలో ప్రైవేట్‌ వాహనాలకు సడలింపులు ఇస్తే సమాన పోటీ పరిస్థితి ఉండదని ఆయన అన్నారు.

    తెలంగాణ గిగ్‌ అండ్‌ ప్లాట్‌ఫాం వర్కర్స్‌ యూనియన్‌ అధ్యక్షుడు షేక్‌ సలావుద్దిన్‌ మాట్లాడుతూ, “ప్రైవేట్‌ వాహనాలకు వాణిజ్య వినియోగానికి అనుమతి ఇస్తే వాణిజ్య వాహనాలు కొనుగోలు చేసిన డ్రైవర్లకు తీవ్ర నష్టం జరుగుతుంది,” అని చెప్పారు. అగ్రిగేటర్‌ ప్లాట్‌ఫాంల ద్వారా సేవలు అందించే డ్రైవర్లు ఇప్పటికే ఆదాయ అస్థిరతను ఎదుర్కొంటున్నారని, కొత్త విధానం క్యాబ్‌, ఆటో రంగాలపై మరింత ఒత్తిడి తెస్తుందని ఆయన అన్నారు.

    HIGHLIGHTS

    - కేంద్ర ప్రతిపాదనపై తెలంగాణ క్యాబ్‌ సంఘాల వ్యతిరేకత

    - వైట్‌ నంబర్‌ ప్లేట్‌ వాహనాల వాణిజ్య వినియోగంపై అభ్యంతరం

    - ప్రయాణికుల భద్రతపై స్పష్టత కోరిన నాయకులు

    - అమలు చేస్తే ఉద్యమం చేపడతామని హెచ్చరిక

    ప్రయాణికుల భద్రత అంశాన్ని కూడా సంఘాలు ప్రధానంగా ప్రస్తావించాయి. ప్రమాదాలు జరిగినప్పుడు బాధ్యత ఎవరిది, ప్రయాణికులకు ఎలాంటి ఇన్సూరెన్స్‌ రక్షణ ఉంటుంది, అగ్రిగేటర్ల పాత్ర ఏమిటి అనే అంశాలపై ప్రభుత్వం స్పష్టత ఇవ్వాలని నాయకులు కోరారు. “మహిళా ప్రయాణికుల భద్రతకు పటిష్టమైన చర్యలు లేకుండా బైక్‌ ట్యాక్సీలకు అనుమతి ఇవ్వకూడదు,” అని షేక్‌ సలావుద్దిన్‌ అన్నారు.

    క్యాబ్‌, ఆటో, ఇతర వాణిజ్య వాహనాలపై ఆధారపడి జీవిస్తున్న డ్రైవర్ల ఆదాయం తగ్గే ప్రమాదం ఉందని సంఘాలు పేర్కొన్నాయి. అన్ని రకాల వాహనాలకు ఒకే విధమైన నిబంధనలు, పర్మిట్‌ వ్యవస్థ, భద్రతా ప్రమాణాలు అమలు చేయాలని వారు డిమాండ్‌ చేశారు. “ప్రయాణికుల భద్రత, డ్రైవర్ల సంక్షేమం, అగ్రిగేటర్ల బాధ్యతలను పూర్తిగా పరిశీలించిన తర్వాతే నిర్ణయం తీసుకోవాలి,” అని నగేశ్‌ చెప్పారు.

    కేంద్ర ప్రతిపాదనలను తెలంగాణ ప్రభుత్వం అమలు చేయరాదని క్యాబ్‌ సంఘాల నాయకులు కోరారు. ఈ అంశంపై ప్రభుత్వం డ్రైవర్ల సంఘాలు, గిగ్‌ వర్కర్ల ప్రతినిధులు, రవాణా శాఖ అధికారులతో చర్చించాలని వారు అన్నారు. ప్రతిపాదనపై ముందడుగు వేస్తే రాష్ట్రవ్యాప్తంగా పెద్ద ఎత్తున ఉద్యమం చేపడతామని సంఘాలు హెచ్చరించాయి. తదుపరి నిర్ణయంపై ప్రభుత్వం నుంచి స్పష్టత కోసం డ్రైవర్ల సంఘాలు వేచి చూస్తున్నాయి.